Waxaa dhawaan si guul leh ugu soo gabagaboobay magaalada Muqdisho shir-cilmiyeedkii shanaad ee ay soo qabanqaabisay Xarunta Cilmibaarista iyo Daraasaadka Maqasid, kaas oo sanadkan hal-ku-dhiggiisu ahaa Federaaleynta Soomaaliya
Shir-cilmiyeedkan ayaa socday muddo laba maalmood ah, waxaana ka qeybgalay aqoonyahanno, culimo, xeeldheerayaal siyaasadeed, cilmi-baarayaal, masuuliyiin dowladeed iyo marti sharaf kale oo ka kala yimid gudaha dalka iyo dibaddiisa. Ujeeddada shirku waxay ahayd in si cilmiyeed oo qoto dheer loo falanqeeyo nidaamka federaalka Soomaaliya, caqabadaha horyaalla, fursadaha jira, iyo mustaqbalka suurtagalka ah ee nidaamkan marka la eego duruufaha siyaasadeed, bulsho iyo dhaqaale ee dalka
Intii uu socday shir-cilmiyeedku, waxaa la soo bandhigay warqado cilmi-baariseed kala duwan oo taabanayay mowduucyo ay ka mid yihiin
Asalka iyo horumarka federaaleynta Soomaaliya
Khibradaha dalalka kale ee nidaamka federaalka ku dhaqma
Caqabadaha siyaasadeed, sharci iyo maamul ee hirgelinta federaalka
Doorka federaaleynta ee midnimada qaranka, wadajirka bulshada iyo xallinta khilaafaadka
Ka qeybgalayaashu waxay si furan u yeesheen dood iyo is-dhaafsi aragtiyeed, taas oo horseeday talooyin wax-ku-ool ah iyo gunaanadyo muhiim u ah hoggaaminta siyaasadeed, hay’adaha dowliga ah iyo bahda cilmiga
Gabagabadii shir-cilmiyeedka, Xarunta Cilmibaarista iyo Daraasaadka Maqasid waxay adkaysay sida ay uga go’an tahay sii wadista doodaha cilmiyeed ee ku saabsan arrimaha masiiriga u ah dalka, gaar ahaan kuwa la xiriira dhismaha dowladnimo, nidaamka maamul, iyo xoojinta midnimada iyo xasilloonida Soomaaliya
